的士起步价 - 全国票务-首页

的士起步价

白话广州 最近城中大事,莫过于的士调价,今次多咗样“夜间费”。估计之后一段时间,打的都系街坊嘅谈资。 广州的士调价次数唔多,但你又知唔知啱啱有的士嘅时候,起步价系几钱呢?广州最早嘅的士公司出现喺上世纪70年代后期,佢就系依家依然系的士企业龙头嘅白云公司。不过当时嘅白云的士唔系“蓝的”而系“红的”,车顶顶灯写住“TAXI”。的士出现,“扬手即停”,改变咗一代广州人嘅出行习惯。嗰个时候,“红的”嘅起步价系“个半”3公里(1.5元3公里),续租嘅话每公里5毫。如果系皇冠车嘅话,续租价要再贵1毫。 依家听落呢个价格真系“白菜价”,但唔好忘记,当年物价水平唔高,马路上都冇几部私家车,打的属于“高消费”。而维持得最耐嘅的士运价,应该就系实行咗13年嘅7蚊起步价。喺呢个阶段,街坊又接触多咗样“新鲜事物”——燃油附加费。不过,自从的士起步价调整到10蚊之后,呢个燃油附加费亦都随之消失,冇再收过喇。 今次调价,对于大多数人嚟讲冇咩影响,可能就系夜间出行成本稍为提高。所以,大家最担心嘅系钱俾多咗,但系体验就冇改变。讲实话,今时唔同往日,出行大把选择,的士想留客都系要搞好服务先得。 ◎李月婷 媒体人

-